政情：徐英偉惹逃婚疑雲 馮興禮笑言要徹查
男人結咗婚就要擔起頭家，真係好大責任，有啲人臨婚前都相當恐懼。話說勞工及福利局副局長徐英偉（Caspar）約十年前結婚當日嘅早上，曾經一度失蹤，班兄弟搵唔到佢，唔通想逃婚？Caspar就解釋，當日只係唔知醒，遲咗十幾分鐘啫，結婚壓力大，所以前一晚夜瞓喎。
馮諗住喺英國擺酒
Caspar強調，當時佢係同父母一齊住，冇周圍去玩，而且只係遲咗同班兄弟會合，其他嘅流程都冇遲到過。
佢身邊嘅勞福局政治助理馮興禮就笑指「非常可疑」，點解搞到咁夜，叫大家要徹查下發生咗咩事。Caspar即時還擊，叫今年內即將做「老襯」嘅馮興禮要喺婚禮前早啲瞓，唔好遲到。
講起婚禮安排，馮興禮話，打算喺英國擺酒，香港就唔擺喇，好彩太太都同意，大呻如果喺香港擺酒相當麻煩，事關唔請會驚人嬲，請咗又驚人哋嚟飲嫌麻煩，依家唔使喺香港擺酒就安樂晒喇！