政情：盧偉國工作困身 音樂「玩」多過「聽」
立法會議員盧偉國音樂造詣有番咁上下，中西樂都難佢唔到，但講起最近非常搶手嘅久石讓音樂會，佢都大讚呢位來自日本嘅作曲家出色，家中更有收藏其CD同樂譜。呢場音樂會門票遭人炒賣至過萬元，盧偉國都話貴，所以唔會去睇，但就認為證明香港人對藝術需求大，所以需要更多表演場地喇。
盧又話，對任何音樂類型都有興趣，所以鍾意去聽音樂會，不過現時議會工作比較困身，加上鍾意同朋友夾Band多啲，咪寧願去玩音樂多過聽音樂會囉。
盆菜宴出鑽石色士風娛賓
盧偉國尋日出席盆菜宴時，就出動新寶貝鑽石色士風娛賓，好有噱頭。佢話上台吹奏鑽石色士風時，有燈光射住更加閃，舞台效果真係十足。佢又透露，將會喺下星期同其他議員合作演出，但人數就唔夠去組成一隊樂隊，唔知會唔會有更多深藏不露嘅議員幫手喇。