政情：誹謗葉劉案 鄭經翰 袁彌明道歉賠償
南區區議會海怡西選區喺二○一四年三月，因為原區議員馮煒光加入政府，令到議席出缺需要舉行補選，而新民黨有份角逐呢場補選，更引發一場誹謗官司。事緣當時前立法會議員鄭經翰及人民力量前主席袁彌明涉嫌對新民黨主席兼立法會議員葉劉淑儀作出不實指控，葉劉就提出訴訟告兩人誹謗。事件拖咗三年幾，鄭經翰同袁彌明上月終認衰向葉劉公開道歉，並作出賠償，呢啲真係禍從口出自作孽。
葉劉淑儀尋日喺社交網站留言交代誹謗官司嘅進展，話呢場拖咗三年幾嘅訴訟「終於得到圓滿解決」。葉劉話，三年幾前鄭經翰及袁彌明就鴨脷洲海怡半島商場擬改建特賣場一事，對其作出不實指控，佢當時就採取訴訟。呢場拖咗三年幾嘅訴訟近期終圓滿解決，鄭、袁二人已向佢公開致歉並作出賠償，最後階段就係雙方就訟費數目作出商討。葉劉又話，好高興雙方唔需要再因為呢單誹謗案而對簿公堂，亦感謝鄭、袁作出嘅安排。
袁彌明亦喺其社交網站專頁留言，佢曾於個人社交平台帳戶轉載咗二○一四年五月二十九日網絡電台節目《風波裡的茶杯》，喺嗰個節目中，鄭經翰就鴨脷洲海怡半島商場擬改建特賣場一事針對葉劉，作出未經核實嘅指控同評論。而葉劉就喺同年七月底在高等法院提出訴訟，指佢同鄭經翰誹謗。
主動提出和解獲接受
袁彌明又透露，去年十二月，佢同鄭經翰建議向葉劉提出和解，並獲葉劉接受。葉劉已接受該筆和解金額，而佢本人亦確認無條件收回針對葉劉而作出及散播嘅未經核實言論，並對為葉劉帶來嘅一切滋擾、尷尬及不便表示抱歉。有網友回應葉劉話：「大班終於得教訓，唔係聲大就惡晒」，亦有網友指傷害已造成，賠償就可以當無事？不過，當雙方就訟費達成共識後，相信事件將會告一段落喇。