中環出更：被DQ發窮惡 陳國強追五萬保證金
沙田區區議員陳國強早前報名參選下月舉行嘅立法會新界東議席補選，結果被選舉主任指佢過去言行主張港獨，所以裁定佢提名無效，係佢繼二○一六年立法會換屆選舉後第二度被DQ（取消資格）。陳國強講過今次係問人借錢參選，點知連閘都入唔到，佢發窮惡話一定要追討選舉主任退還五萬元選舉按金。
劉頴匡話啲錢夠買股票
陳國強喺網上話選舉主任畀佢嘅DQ信件，並無提及會否退還五萬元「保證金」，又指今次參選係由兄弟借錢，強調「我都要還錢」，要求選舉主任盡快退還五萬元，否則「直接上妳Office收票」。另一參選新界東補選被DQ嘅獨立本土派劉頴匡亦發惡，要求盡快退還選舉按金，「依家個股市升得咁勁，五萬元夠我買股票啦」。兩人都話會喺明日（5日）去選舉事務處要求退還按金。
根據《立法會選舉活動指引》，如候選人未獲有效提名，或者退出競選，將可退回選舉按金，但就必須自行填寫「發還選舉按金」嘅申請表。按照指引，自行退選嘅九龍西參選人袁海文應可退回按金，至於一眾被DQ人士，當局就只話會依據指引行事。
卓妮