中環出更：唐偉章中亞之旅 為兒童視覺篩查
香港嘅「四眼一族」為數甚多，理工大學去年就推行「看見愛流動護眼計劃」，為社區提供基層預防性眼睛健康檢查同護眼教育，而理大基金管治委員會成員鄺美雲（Cally）就發起「看見愛基金」為計劃籌募經費。今年計劃已踏入第二年，理大校長唐偉章同Cally尋日就一齊出席新一年計劃啟動禮，唐偉章更分享去年曾帶學生到中亞國家吉爾吉斯考察，發現原來當地好多人深近視但無戴眼鏡。
唐偉章自爆十一歲開始戴眼鏡，深感正常視力之可貴，因此支持護眼計劃，去年暑假與三十多位理大眼科視光學院學生遠赴吉爾吉斯服務學習，為當地兒童提供視覺篩查服務。
修理舊眼鏡 寄畀當地人使用
唐校長話，有份驗眼嘅五百多位當地人之中，患近視者竟高達四分之一，但最令佢哋感到錯愕嘅係當地欠缺視光服務，有近視都無法配眼鏡，結果同學返港後，要修理一批回收嘅舊眼鏡，再寄畀當地人使用。
唐校長主張年年驗眼以保持視力，而佢早前就換咗新眼鏡，因為近視度數稍為下降，而舊眼鏡就會考慮捐出，希望可以幫到有需要嘅人。理大眼科視光學院主任杜嗣河就話，智能手機加劇近距離閱讀嘅陋習，令近視惡化。
鄺美雲護眼 昏暗下唔睇手機
至於Cally就話過去探訪老人院，發覺好多時長者受傷都係因視力問題引起；佢又認識幾位朋友，因視網膜手術而要俯臥在床一個月，相當辛苦，所以佢會好自覺咁保護雙眼，盡量唔會喺昏暗環境下睇手機。Cally透露，除了偶爾要靠老花眼鏡輔助之外，基本上視力保持良好，但都要定期驗眼先至安心。
卓妮