政情：今日你上鏡：郭偉强被點名 上台做職安操

每逢周六、日，一眾議員都會四出參加活動。工聯會嘅郭偉强尋日喺Facebook上載咗張相，兩隻手分別向上向下伸到直，搞邊科？原來佢做職安操。郭偉強話朝早係繪畫比賽頒獎禮，主要推廣平衡生活，大會加插環節請老師嚟教做職安操，佢仲被老師點名叫咗上台一齊操添！唔通老師驚佢平日公務繁忙疏於運動，所以要做多啲以免整親？睇佢做嘅動作有板有眼咁，應該唔係第一次操喇？佢就笑認之前去活動都有操過。