政情：三料議員劉業強區會出席率低 大懶蛇上身

會議撞埋同一日 劉呻無辦法

喺六十四名立法會議員中，有二十三名身兼區議員嘅「雙料議員」，而「三料議員」除咗鄉議局功能界別嘅劉業強之外，另一個係港島區直選議員張國鈞。點解出席率咁低？劉業強就呻話無辦法，皆因行會、區議會大會、委員會會議，通通都係喺周二開會，只可以三揀一，咁舊年七月開始因為想了解多啲行會工作，所以依家每去兩次行會就去一次區議會，遲吓會擺番多啲時間落區。

劉業強仲話以前爸爸（劉皇發）做區議會主席就無計，變相要同行會請假，要兩邊走。不過劉業強強調唔一定開會先幫到村民嘅，逢周日早上佢都會同村民見面，又有唔同鄉事幫手，盡量做得幾多得幾多喇！

四名雙料議員亦成缺席常客

其實部分「雙料議員」喺區議會會議嘅出席率未如理想，例如荃灣區陳恒鑌、葵青區梁耀忠、麥美娟同元朗區梁志祥，四人喺六次大會都缺席咗一次，但佢哋同時都係委員會會議嘅缺席常客，例如陳恒鑌加入咗三個委員會，但其中環境及衞生事務委員會六次會議中，佢只係出席咗兩次，出席率得百分之三十三；梁耀忠就係該區社區事務委員會同房屋事務委員會嘅成員，但六次會議分別只係出席咗四次同三次，即出席率分別係百分之六十六同百分之五十。

梁志祥本身加入咗三個區議會轄下嘅委員會，但好快就退咗其中兩個，剩番地區設施管理委員會，可惜六次會議只係出席咗三次，出席率只係百分之五十；麥美娟都只係加入咗該區交通及運輸委員會，五次會議出席咗三次，出席率為百分之六十，外加有出席唯一一次嘅特別會議，情況好過梁志祥少少。

之不過，都有啲「雙料議員」係勤力嘅，例如離島區周浩鼎、油尖旺區涂謹申、東區邵家輝，喺二○一七年係出席晒所有會議。