中環出更：拍拖等女友 馮興禮訓練發吽哣
發吽哣以往畀人覺得係唔專心嘅表現，但早前有香港大學生以發吽哣揚威國際，令人開始關注到發吽哣嘅好處。勞工及福利局政治助理馮興禮（Henry）就話發吽哣有助放鬆，更自言擅長發吽哣喎。
Henry話工作期間絕對唔會發吽哣，因為勞工及福利局局長羅致光會突擊問問題，好似會問數據同埋幾日前講過嘅嘢，睇嚟Henry工作時係連發吽哣嘅機會都無，更要打足十二分精神喇！
最多可以呆30秒
不過，Henry就話同女友相處嘅時候係訓練發吽哣嘅機會。咁大膽唔怕女友詐型？佢解釋，女友係事務律師，工作比佢更忙碌，有時拍拖都會收到同工作有關嘅電話，呢段時間就係佢發吽哣嘅機會喎，認真搞笑！
咁佢可以發幾耐吽哣呢？佢竟然話只有三十秒，同之前維持一個鐘以上而勝出發吽哣大賽嘅大學生相差好遠，睇嚟佢仲有一大段距離先稱得上擅長喎。
卓妮