中環出更：接莊後「進帳」八磅 陳細潔呻陰功
由保良局近廿名新舊董事會成員組成嘅保良之友團體名下愛駒，早前喺保良局百周年紀念盃賽中勝出，成為保良局贊助盃賽四十年嚟首次「自己盃自己攞」。咁開心，梗要開個祝捷會慶祝吓。保良局主席陳細潔（Abbie）、副主席馬清楠等人都有到場。Abbie接莊做主席近十個月，佢笑稱「進帳」咗八磅，好陰功，因為日日唔係坐就係食，又冇時間做運動喎。
身形纖瘦嘅Abbie笑稱，上任以來日日一係坐低開會，一係食飯，所以未夠一年已重咗八磅，就算間唔中去滑雪都於事無補，認真大件事。本身係律師嘅馬清楠都要開唔少會，但身形保持得好好，原來佢除咗奉行飲食清淡、做運動嘅原則之外，仲有特別秘訣，就係企喺度或微蹲開會，隨時練腳力，所以唔怕膝頭未老先衰。
張心瑜日行萬步肥唔番
鍾意行山嘅保良局前總理張心瑜近年日行萬步，減重成績有目共睹。點知佢笑唔出，事關兩年未夠合共瘦咗十七磅，大大超出佢嘅預算。佢話初初真係想減肥，但係想停時竟然停唔到，依家就算食多咗嘢都肥唔番，先知增肥都好難，佢話想增番十磅咁多添！
葉楚航憶膽粗粗考騎師
保良之友團體係由前主席鄭錦鐘、總理陳正欣同前副主席顏金煒三位經理人打理。陳正欣話今次贏馬最特別之處係練馬師葉楚航都係保良局旗下學校畢業。葉楚航笑稱，當年考騎師嘅要求係體重九十磅以下、身高唔超過五呎三，當年佢只得八十八磅，身高未夠五呎，於是膽粗粗去考，估唔到走出一條精彩人生路。
卓妮