因宣誓無效而被取消資格（DQ）嘅原建築界立法會議員姚松炎，尋日正式報名參加立法會九龍西補選，多名民主派成員都有去撐場，包括其「Plan B（後備）」人選民協前立法會議員馮檢基。不過，據聞公民黨密謀推翻初選協議，推舉該黨主席兼前立法會議員梁家傑頂替馮檢基（阿基）做Plan B，引起其他民主派非議。
民主派早前就立法會新界東及九西補選舉行初選，其中九西初選由姚松炎勝出，阿基得分排第二，按照原先協議，一旦姚松炎被選舉主任再次DQ，阿基就可以自動頂上代表民主派出戰九西。不過，有人質疑阿基喺民主派內部人緣欠佳，吸票能力亦較低，未必能戰勝代表建制派出選嘅民建聯鄭泳舜。
據聞公民黨曾私下提議由梁家傑頂替阿基做Plan B。公民黨黨魁楊岳橋拒絕證實有關消息，但強調應該搵最合適嘅人選。民主黨主席胡志偉就認為應按原定機制辦事，否則會引起更大後遺症。
有民主派中人質疑，自毛孟靜退黨後，公民黨喺九西就冇立法會代表，該黨可能擔心支持阿基出戰補選，會影響佢哋喺二○二○年立法會選舉中重奪九西議席嘅機會，質疑公民黨此舉係為咗自己利益。
沙田區議員陳國強尋日亦正式報名參加新東補選，連同工聯會鄧家彪、新同盟范國威及「娥姐」陳玉娥，該區至今已有四人報名。不過陳國強曾因支持港獨而被取消參選資格，政界估計佢好大機會再次被選舉主任DQ，影響唔到大局。