政情：有相為證：林超英大爆吳安儀讀會計減壓
有乜嘢可以將天文台前台長林超英同「四眼Cue后」吳安儀扯埋一齊呢？咪就係因為佢哋係校友囉，林超英仲大爆四眼Cue后讀會計，係用嚟紓緩壓力o架！
好開心以校友身份同站台
林超英尋日喺Facebook上載咗一張同吳安儀嘅合照，呢張相係佢哋喺香港大學專業進修學院六十周年晚宴上同台演出影嘅，事隔逾四個月，為乜舊事重提呢？林超英貼文話人生由無數快樂時刻組合而成，同年輕四十歲嘅吳安儀以「校友」身份一起站台，短暫嘅交流帶來無窮歡樂，跟住大讚吳安儀開心、溫文、冷靜，兼爆埋吳安儀以學習會計嚟紓緩壓力，順便開拓一個人生新領域，喺佢身上睇到香港未來嘅希望咁話。
讚咗咁多，其實係想講佢同吳安儀有個共通點，就係四十年前同吳安儀年紀相若嘅佢偶然學習咗觀鳥，亦開拓咗人生新領域，意外咁成為咗吳安儀嘅同校師兄嘞，仲話大家不斷學習，持續有新發現，先係人生開心嘅法門。大家不妨學吓佢哋，搵出自己嘅人生新領域。