政情：司馬文上傳攝太歲短片 暗寸吳永輝？
每逢農曆新年臨近，生肖與新一年相沖、即俗稱「犯太歲」嘅中國人，都會透過「攝太歲」嚟趨吉避凶，防範小人當道，但估唔到連荷蘭裔嘅南區區議員司馬文都興呢家嘢，尋日喺社交網站上載咗一段自己「攝太歲」嘅短片。近日有傳民主黨成員吳永輝亦有意出戰立法會建築、測量、都市規劃及園境界補選，同司馬文「爭食」，唔知後者今次咁做，係咪暗寸吳永輝係小人呢？
有傳吳擬戰補選「爭食」
短片顯示，司馬文託人幫佢喺啲香燭衣紙等寫上自己嘅中文名，然後親自點火燒衣及向所屬嘅「太歲」神像誠心上香。司馬文今年啱啱好六十歲，生肖屬狗，即來年會「犯太歲」，因此要「攝太歲」化解。佢又自言「五十而知天命，六十而耳順」，期望嚟緊一年一切都順利平安。
民主派早前經過多番協調，先至定到由司馬文出戰今年三月嘅建築界補選，挑戰建制派嘅前建築界議員謝偉銓，喺單對單嘅情況下，司馬文選情本已不甚樂觀。依家更有傳本身係規劃師嘅吳永輝有意加入戰團，如屬實肯定會分薄民主派票源，明益建制派。