政情：弦樂高手張秀賢最識「拉」
中大前學生會會長張秀賢參與社運多年，當年喺學民思潮時，一副乖仔毒男形象，仲曾經特登染金髮改變形象。不過，咪睇佢毒毒哋，其實係弦樂高手，仲有二胡九級資格、而小提琴仲考到演奏級添。既然佢乜都識得「拉」，仲要「拉」到咁叻，睇個勢拉布對佢嚟講應不成問題。
張秀賢透露，佢喺小學時候已經開始學二胡同小提琴，中學仲有加入中樂團，當時係無啦啦去學，依家大個咗就比較忙，冇乜時間再拉喇。除咗二胡同小提琴，佢仲透露識拉少少低音大提琴同大提琴，話因為大家都係差唔多類型，容易啲掌握到喎。
為民主派初選辭演劇團
唔單止樂器，張秀賢仲有參加劇團同游水。劇團方面，佢話劇團去年七月份已經演出過一次，但每次完成演出後都會覺得好攰，加上去年十二月忙於民主派初選嘅事，所以佢決定辭演。至於游水方面，佢就話喺中學時有練過，但由於需要花好多時間操練，所以決定放棄。