政情：梁耀忠謀永續參選 引爆退黨潮？
自認「政壇李克勤」嘅民協前立法會議員馮檢基（阿基）遲遲唔肯交棒，並一意孤行要參與立法會九龍西補選，引發大批年輕及中生代黨員先後退黨，被網民嘲諷佢想「永續參選」。另一民主派老將、與馮檢基同樣已六十四歲嘅現任街工立法會議員梁耀忠，近日亦向黨友透露有意喺下屆立法會繼續參選，並且想由現時嘅超級區議會功能界別（超區），重返新界西地區直選，令其他黨友更難上任，引發兩名街工區議員先後退黨。
在新界西多度連任嘅梁耀忠，喺二○一六年立法會選舉決定冒險轉戰超區，改由中生代黨友黃潤達出戰新界西，雖然最後只有阿忠當選，黃潤達落敗，但起碼係嘗試過交棒同企圖為街工爭多個位，冇人會怪佢。但據聞佢近日向黨友多番表示，自己日日跑步，「精力充沛」、「唔做嘢唔得」，暗示會繼續參選競逐連任。
傳重返新界西爭取連任
最離譜嘅係，阿忠唔係想循超區連任，而係有意重返新界西老巢出戰，理由係佢早前主持立法會主席選舉期間臨陣退縮，惹來不少民主派支持者同網民猛烈批評，令佢自感政治能量大跌。由於其他街工成員缺乏全港性知名度，冇乜可能轉戰超區，此舉意味街工喺二○二○年立法會換屆選舉，可能只有阿忠一人出選，其他人最少要再等多六年先有望上位，自然會引起不滿。其中葵青區議員梁錦威及周偉雄，最近先後退出街工，令該黨只餘下包括阿忠、黃潤達及梁志成三名現任區議員。
稱成員退黨與選舉無關
梁耀忠接受查詢時，自稱仍未決定下屆會否參選，反指有關言論係有心人造謠，又強調周偉雄退黨絕不涉及選舉問題。黃潤達則指周偉雄退黨係想多啲時間陪伴家人，至於佢自己就仲未考慮參選事宜喎。咁啱尋日黃潤達去咗立法會做嘢，阿忠就即刻急Call佢現身一齊闢謠。
民協喺今屆區議會及立法會選舉失利後，被地區死敵民主黨撬走咗多名區議員及資深黨員，令該黨早已「空洞化」，加上阿基近日聲言今次補選係佢最後一次參選，隨時經過一九年區議會及二○年立法會換屆選舉洗禮後，民協從此會喺香港政壇上消失！同屬老牌民主派地區政團嘅街工，會否步民協後塵逐步萎縮摺埋，大家拭目以待喇！