中環出更：推動新界減碳 劉業強帶頭示範
香港人環保意識漸濃，除咗由自身嘅小習慣做起，公司同企業都可以作出改變，為地球出一分力。鄉議局尋日就舉行研討會，討論太陽能實行嘅困難及解決方法，更邀請到環境局副局長謝展寰出席。鄉議局主席劉業強透露，位於沙田石門嘅鄉議局大樓將會「Go Green」，實行充當環保先鋒。
劉業強話，香港面對唔少限制，所以限制咗水力及風力發電嘅發展，但並唔代表唔可以發展可再生能源，因為仲有太陽能可以考慮。佢仲話，發展太陽能需要依靠屋宇及土地，而新界就有四萬幢村屋，可謂最適合用作太陽能發電嘅地方，難怪佢話可以用新界支持減碳喇！
為鄉議局大樓裝太陽能設備
雖然新界有優勢可以發展太陽能發電，但劉業強就透露有唔少村民仲有疑問，所以認為政府應該就規劃及發展方面拆牆鬆綁，提供誘因畀村民咁話。至於鄉議局大樓，目前就研究緊將所有出口指示，由光管改為LED燈，又喺大樓天台搵到合適地方安裝太陽能設備，睇嚟大樓有望成為示範，帶動鄉郊環保節能嘅風氣。
卓妮