中環出更：名人齊追星 「大盜歌王」林沖現身
唔少年輕人都有追星夢，香港電影資料館現正舉行「永遠的鑽石大盜——林沖影展」，放映六、七十年代紅極一時嘅台灣巨星、「大盜歌王」林沖嘅多部經典影片。早兩日八十幾歲嘅林沖於放映後現身同影迷會面，唔少城中名人都有到場，包括珠寶設計師劉黃寧達（Leta）及妹妹林黃寧艷（Lianne），仲有太子珠寶鐘錶主席鄧鉅明等人，唔通名人也追星？
其實林沖係Leta兩姊妹嘅舅父，感情十分要好。難得香港電影資料館咁有心為林沖整理一生嘅輝煌，又請佢口述歷史，所以兩姊妹幾忙都要去捧場力撐。
劉黃寧達拉隊撐舅父
出身台南望族嘅林沖，母親係日本人，當年佢去日本讀大學時，因緣際會登上舞台，喺日本爆紅之後被香港發掘，拍咗幾部戲即紅遍東南亞，所以佢都係香港電影歷史嘅重要一環。見林沖外形咁俊朗，Leta兩姊妹又生得咁標致，就知遺傳到家族靚基因喇！
保安局局長李家超太太Janet都有到場，佢笑笑口話係嚟追星，因為自細喺電視機前睇林沖唱歌、演戲，林沖嘅成名戲「大盜歌王」中，唱到街知巷聞嘅「鑽石鑽石亮晶晶」主題曲，佢都識唱o架。
眾人亦趁機欣賞「大盜歌王」呢套戲，男主角喺戲中扮演鑽石大盜，咁啱年關臨近，唔知鄧鉅明睇完會唔會加強旗下店舖保安呢？佢就笑笑口話唔使，買齊晒保險就得嘞，佢仲叮囑前線員工，萬一遇上劫案，最緊要係個人生命安全，千祈咪博喎！
卓妮