涉劏房虐兒 單親母保釋後Fb發貼否認
【本報訊】單親媽保釋後Fb留言「我變得很強大」，八歲女拍片稱「有媽媽細佬就得」。姓高（卅一歲）婦人涉虐待一對年幼子女被捕，前晚獲准保釋候查後，即在Facebook發貼報平安，指：「我無事更加無虐兒，我仲係宇宙最強的可兒！我啱啱自己擔保出來，我的能力可以自己擔保出嚟，你哋應該清楚知道我為人係如何，應付到所有，謠言止於智者。」並感謝各方好友的關心。之後她又改貼出一張經典語錄圖片：「如果有一天，我變得很強大，謝謝你們，曾經噁心的狗眼，謝謝你們，扭曲事實的爛嘴。」
其父留言「永遠保護你」
高父在貼文留言：「爸爸永遠的保護你，企在你身旁！」友人得悉高婦無恙，紛紛放下心頭大石，鼓勵她︰「唔好再鑽牛角尖啦！一定會撐你，唔好再嚇我啦！我黐晒線咁打電話去醫院同差館搵你，瞓覺發夢都見到你，喊醒！」、「你要加油！撐住呀！」不過，高婦昨未有回家，屋內僅傳出狗吠聲。
至於網上流傳一段短片，疑為案中八歲女童向媽媽自白，內容提及知道媽媽「好辛苦」、「身體好差」、「好唔舒服」及「腰骨痛」等，着媽媽「唔好唔開心」，因為有他們一對小姊弟陪伴。女童又說只要「有媽媽細佬就得」，一家三口在一起已足夠。據悉，該短片去年八月由高婦上載到Fb，並留言：「一路睇一路喊。」
事發上周四（11日），社工到旺角南頭街五號探訪一對長時間缺課的八歲及五歲小姊弟，雖然其母在屋內，惟拒絕開門讓社工入屋，社工擔心小姊弟安全報警，揭發兩童居住的劏房單位環境惡劣，屋內滿地屎尿，他們由救護車送院檢查，母親涉嫌虐兒被捕。
