政情：騸雞復出踩過界的士都睇埋
本港的士問題一籮籮，港府尋日成立「的士服務質素委員會」，討論點樣改革目前約一萬八千架的士嘅服務質素，細睇委員會名單，竟然出現民主黨（白鴿黨）嘅立法會前議員單仲偕騸雞嘅名。騸雞亦曾經做過資訊科技界（IT）議員，所以為IT發聲就聽得多，因乜事轉咗去管理的士呢？
稱港府欲以科技提升服務
騸雞回覆查詢時話政府打算透過科技提升的士服務水平，所以主動邀請佢加入，係佢卸下立法會議員之後，首個新嘅公職任命。佢又話外國的士已落實唔少新技術，例如位置定位、分享車資，或車廂提供Wi-Fi等等，但最關鍵係政府同業界係咪有決心配合同落實。佢除咗曾經係IT議員，亦係香港電腦學會資深會員，曾經任職滙豐銀行資訊科技部副經理，科技背景毋庸置疑，但「溝埋」的士究竟係咪可行呢，真係要拭目以待。
另外，民航機師兼公民黨（公文袋）嘅立法會議員譚文豪（Jeremy）亦係委員之一，唔通離地太耐想轉做司機？Jeremy就話其實除咗飛機，逢係交通運輸佢都好關注，就算係道路規劃都會睇。佢早排仲飛去首爾、台灣等地睇航拍機同共享單車規管添！