中環出更：打慣免費遊戲高偉國入股課金市場
智能手機盛行嘅年代，唔少年輕人靠開發一隻人氣手機遊戲App（應用程式）就一夜致富。家族做鐘錶生意嘅香港表廠商會副會長高偉國（Tim）最近都睇好手遊前景，入股咗一間由好友創辦嘅手遊公司。佢笑言一向唔沉迷打機，打嚟打去都係玩免費足球遊戲，未試過畀錢，所以唔明點解手機遊戲可以賺錢，直至最近跟住好友試玩要畀錢買武器嘅遊戲，發覺原來真係有人不停畀錢玩遊戲嘅喎，一於入股喇！
Tim話入股嗰間手遊公司係中學同學鄭天進有份創辦嘅，兩人相識多年，都有一齊投資其他行業。最近佢跟住鄭天進玩一隻手機遊戲，見對方一直用錢，自己就學佢用吓錢買武器，結果一個月大約使一百蚊。Tim笑笑口話，連自己咁慳嘅人每個月都要用一百蚊，相信鍾意打機嘅人實使得仲多。
共享工作空間受創業者歡迎
當日係手遊公司嘅開幕儀式，地點位於港島一個工廈內嘅共享工作空間，呢個共享工作空間嘅投資者Albert大約兩年前開始投資共享工作空間，畀青年創業者租用，估唔到勁受歡迎，依家已經開咗五個。
Albert話每個點都有唔同行業主題，例如有時裝、IT、市場推廣、設計同產品等，將相同行業內唔同工序嘅創業者聚埋，效果都唔錯。
Tim嘅爸爸高叔平、媽媽高李蓓蒂（Betty）都去支持個仔。Betty係已故大慈善家李惠利個女，佢爸爸除咗留低鐘錶生意之外，仲有唔少收租住宅物業。Betty笑稱啲物業屋齡都有四十年以上，加上租客要求高，所以佢成日要行建材舖、搞裝修添o架！
卓妮