政情：容海恩蜜運緋聞 葉太引述：像霧又像花
盛傳新民黨立法會議員容海恩（Eunice）同該黨政策總裁袁彌昌蜜運，但Eunice尋日被問及有關緋聞時表明唔回應，然而該黨主席葉劉淑儀則形容係開心事，但被問到當事人有冇向佢透露拍拖時，佢就引述Eunice話：「像霧又像花。」
當事人拒回應 「自己Feel吓」
Eunice甚少談及感情事，但曾透露男友係專業及資深人員協會（專資會）成員。有人話佢哋原本就嚟結婚，但之間出現好大問題，未幾就傳出與袁彌昌拍拖嘅消息。緋聞傳出後，兩人嘅回應都好曖昧，冇承認亦冇否認。
新民黨今日與財政司司長陳茂波會面，就新一份財政預算案提出建議，而喺會面後，Eunice被問及與袁彌昌嘅緋聞，佢表明唔回應，反而葉劉就表現得心情勁靚，形容係開心事，又指該黨桃花旺，撮合唔少情侶。被問及兩人係咪合襯，葉劉話「梗係襯！高度都合襯！」咁當事人有冇向佢透露拍拖一事，佢就引述Eunice向佢話：「像霧又像花。」
日前問起Eunice有冇趁假期同袁彌昌出去玩，佢就話聖誕好忙，之後就一直有活動要出席，所以趁有得抖就留番喺屋企。咁「真命天子」會唔會詐型o架？佢笑住話感情事一向低調，有啲乜嘢就「大家自己Feel吓喇」！