政情：借錢參選勝出 伍凱欣分18個月還
為參選區議會補選要借錢！民主黨成員伍凱欣喺舊年十一月底勝出中西區區議會東華選區補選，佢最近向選舉事務處提交選舉開支申報，總開支約為五萬三千元，當中民主黨選舉捐贈約五千八百元，大部分為選舉物資或服務，最特別係該黨捐贈一筆三百二十八元貸款利息。
錢志健「埋單」不足千元
根據伍凱欣提交嘅資料顯示，佢喺舊年十月獲黨批出一筆三萬五千元貸款，並由本月開始分十八期每月還款，直至明年六月為止，除咗最後一個月係歸還一千元，其餘每月都要還二千元。
伍凱欣當選區議員後，月薪為三萬多元。被問及會唔會盡快還款，佢話短期內冇足夠財力一筆過歸還貸款，又指當稍後取得當局每票十四元資助，資金較為鬆動，就會盡快向黨還款。
至於以百多票之差落敗嘅小學校長、報稱無黨派嘅呂錦強，佢申報選舉開支為四萬六千元，近六成與選舉廣告開支有關，佢未有申報獲得選舉捐贈，換言之要自掏腰包「埋單」。
另外，中西區區議會山頂選區補選當選人楊哲安及落敗人錢志健，二人嘅總開支相若，分別係近四萬八千元及近五萬元，其中楊哲安獲自由黨選舉捐贈約三成，即超過一萬四千元，至於錢志健則獲多名友人選舉捐贈近四萬九千元，最終錢志健自行「埋單」不足一千元。