政情：何君堯Fb炮轟「巴佬」食懵咗
立法會議員何君堯先前被踢爆無正式喺英國同新加坡執業，又話要對主張港獨嘅人「殺無赦」，語出驚人一度成為城中熱話，仲畀泛民議員提議案譴責。
玩諧音 批評大律師公會早前聲明
之後佢沉寂咗一段時間，但尋日凌晨佢又再喺Facebook發文，不點名批評大律師公會就「一地兩檢」發表嘅聲明，仲問公會係咪食懵咗喎！
何君堯尋日凌晨一時左右發文，話近排怪事多籮籮，仲問「巴佬是否食矇（懵）咗？」指斥「巴佬」用一個冇法律地位嘅聲明，去挑戰一個富有憲法地位嘅人大決定，仲要話人無法律基礎，反問「唔通佢有？」佢提到嘅「巴佬」，應該係指大律師公會，因其英文名稱係「Hong Kong Bar Association」，以「Bar」嘅同音字變成中文嘅「巴佬」。