政情：去老齡化 嚴禁世襲 下屆政協大換班

新名單月底揭盅 料80人卸任

現時港區全國政協有約一百二十人，而部分香港人亦都循唔同界別出任政協，加埋大約二百人。第十三屆港區全國政協將於今年三月喺北京召開大會，據了解，有關方面將會嚴格執行年齡限制，兼且嚴禁世襲，所以嚟緊新一屆嘅港區全國政協預料將會大換班，而結果本月底就會揭盅，有關人士亦將會收到有關方面通知。

其實過往都有年齡限制，但就冇嚴格執行，一般都係至七十歲就卸任，但有指新一屆只要喺今年三月底滿六十八歲就要退落嚟。而現屆嘅港區全國政協常委陳永棋、戴德豐、林樹哲、鄭家純、吳光正及全國政協外事委員會副主任盧文端等都已接近、甚至過咗七十歲，所以都「夠鐘」卸任喇！

藏污納垢溫床 涉貪腐者勢出局

過往港區全國政協存有世襲，即原本家族有人出任政協，卸任後將會由其他家族成員接任。不過由於嚟緊新一屆將嚴禁世襲，所以一班「紅二代」或「富二代」都唔再順理成章接任政協之位。除咗冇得世襲之外，政協係藏污納垢嘅溫床，所以有部分其身不正、涉貪腐醜聞嘅人，亦冇得留低。

雖然估計將有八十人卸任，聽落好似大把位咁，但由於呢幾屆嘅港區全國政協不斷膨脹，而另一邊廂內地政治其實已行緊精簡化，所以估計有關方面係咪要八十個空缺全數填補仍是未知之數。如果有關方面真係要將港區全國政協精簡化，喺進一步激烈競爭之下，相信又有一班人出嚟爭崩頭喇！