中環出更：卿姐重返立會 嘆年輕議員拒溝通
劉慧卿（卿姐）卸下立法會議員身份之後，尋日首次重返立法會出席公聽會，但佢就慨嘆年輕一代拒絕聽取唔同立場嘅聲音，暗批年輕議員拒絕同政見唔同嘅黨派溝通，導致建制同民主兩派關係僵持。而卿姐更即席示範何謂「和而不同」，喺立法會現身期間，建制議員張華峰（肥老闆）即主動上前打招呼，仲叫卿姐「多啲返立法會探我哋」，卿姐則笑言「企喺華峰隔籬，瘦到不得了呀」，但又讚對方瘦咗。
笑言已退居幕後
其實卿姐喺舊年十月有機會重返立法會，打算出席《2017年僱傭（修訂）（第2號）條例草案》委員會公聽會，但因記錯會議日期而缺席，佢事後喺社交網站道歉添！為免再「甩轆」，佢今次特意再三確認會議日期，而喺有關《公民權利和政治權利國際公約》嘅公聽會發言時，佢提到六人因宣誓風波被褫奪立法會議員資格及一地兩檢風波等事，鏗鏘有力，發言水準似乎未有因卸任而退步。
會後問到點樣看待目前立法會嘅緊張氣氛，卿姐就話年輕人唔願意同立場唔同嘅人溝通，反問「唔通下下拎刀拎槍咩」，認為坐低溝通先係正確途徑。問到會唔會重出江湖再次參選議員，佢則笑說：「出你個頭」，話自己退居幕後絕不會事事過問，然後佢就揮手離開立法會。
卓妮