中環出更：幫學生買鞋 陳兆焯食住包暴走商場
正生書院校長陳兆焯一直鼓勵學生參加長跑，訓練耐力同建立正面人生觀，仲試過同學生一齊參加馬拉松。卓妮尋日就見到好跑得嘅陳兆焯喺中環一個商場暴走，拎住五個鞋盒嘅佢急忙走入男廁，出嚟之後就衝咗入去超級市場，買咗一盒沙律同兩個麵包就拿拿臨去付款處畀錢離開。陳兆焯因乜解究走得咁急呢？
陳兆焯同卓妮講，佢行得咁急，其實係因為要趕住去碼頭搭船，所以就連午餐都冇時間坐低食，要一路行一路食麵包。至於拎住嘅五對運動鞋，佢就話都係幫學生買嘅，因為班學生日日都做運動操練，所以啲鞋好容易爛。其實佢之前都呼籲過社會人士可以捐啲舊嘅運動鞋畀佢哋o架喇！
正生書院學生沖凍水涼磨練
近排天氣凍，位於大嶼山芝麻灣嘅正生書院設施簡陋，唔知班學生會唔會覺得好辛苦呢？陳兆焯就話班學生到依家都仲沖緊凍水涼，佢哋好少煲熱水沖涼嘅，又話可以當係一種磨練喎。正生書院曾經計劃遷往梅窩，但畀當區居民大力反對。至於正生書院幾時先至有新校舍，陳兆焯就話相信有排喇，因為要有新校舍都要等政府批，而正生書院唔同普通嘅中小學，正生嘅問題並唔係教育局要優先處理嘅事務，所以政府應該都唔會心急處理。
雖然新校舍落成無期，但陳兆焯就話啲學生都算OK，佢仲話︰「乖嘅學生都唔係喺我度啦，我係負責教番乖佢哋。」見到作為校長嘅陳兆焯趕頭趕命幫手買鞋，唔知班學生會唔會即刻聽話咗呢？
卓妮