探射燈：政策忽視農地價值 惹地主農民對立

政府未即時凍結 惹大量投機者

「以前話收地就收地，即刻計畀你、賠畀你，邊似依家通晒天先得o架？」上水天光甫菜農阿強認為，政府公布發展計劃後未有即時凍結或收回土地，吸引地產商、中介等外來投機者，「可以想像到會衍生好多問題，租金變化、成個社區變得利字當頭，衝突自然隨之而嚟。」

「其實以前地主同農民關係唔係大家諗到咁惡劣。」馬屎埔花農黃先生表示，以往本港農業相對具價值，地主較樂意租出耕地，「有時天災失收，地主甚至畀我哋遲交租或交少啲租，依家變成想我哋快啲走。」黃先生續指，發展政策未能保護農地價值，地主又擔心租用人逆權侵佔農地，於是租約期滿後往往大幅加租，農民生計受影響，導致兩者成為發展計劃的磨心。