政情：袁嘉蔚呻永遠無人識
香港眾志前晚宣布，南區社區幹事袁嘉蔚當選眾志副主席，換言之同羅冠聰以情侶檔出任正副主席。袁嘉蔚尋日喺眾志Facebook，首次以副主席身份談及女性參政，話自己做乜嘢，外界都將之與羅冠聰拉上關係，大呻永遠無人認識。
羅冠聰喺半年前被取消立法會議員資格，其港島區議席懸空，由於佢被判囚多於三個月，因此未來五年都唔能夠參加各級選舉，之前有傳「替補」人選係袁嘉蔚「代夫出征」或眾志常委周庭「二揀一」，直至前晚先宣布周庭積極考慮參加港島區補選。
做乜都被「扣上羅冠聰名字」
袁嘉蔚喺眾志Fb首先「翻舊帳」，話自從羅冠聰入獄，外界有揣測羅失去議席後「是否女朋友負責代夫出征」，佢話對有關字眼感到好憤怒，反問「就算是選的話，為甚麼不能是因為我有能力而去選呢，或者為甚麼不能因為我是我，所以我走出來選呢？」
佢又話無論自己做乜嘢都會被「扣上羅冠聰這名字」，大呻外界永遠都唔會記得佢個名，指至今仍未搵到答案︰「當你知道我是羅冠聰女友那又如何？代不代表你認識我多了？又不是的啊。」