政情：應耀康笑言細個做風紀 因為曳
唔好以為個個高級政務官細個都係高材生，早前喺立法會門外遇見運輸及房屋局常任秘書長應耀康，佢喺閒談間自爆，自己細個鍾意踢波多過鍾意讀書，睇佢平日成日着西裝，真係估唔到細個鍾意踢波。佢又話自己曾經係唔太起眼嘅學生，笑指做到風紀，可能係因為唔乖被「收編」。
試過會考唔夠分
早前康文署署長李美嫦話過，應耀康係佢喺荃灣官立中學嘅師兄，曾經做過男總領袖生，仲教佢唱校歌，應耀康就澄清自己應該只係做過普通嘅風紀，笑指可能係因為被「收編」先做到，而且母校要求都幾高，自己都試過會考成績唔夠分，原本選科包括文科同理科嘅科目，都被迫要放棄所有理科，要讀全部文科。
不過，佢其後高考成績都唔差，最終考上香港大學，畢業後加入政府。睇嚟一次考試成績真係唔代表一切呢！