政情：「點樣登記做選民」 何啟明收惡作劇電郵？

身兼觀塘區區議員嘅何啟明話上星期收到市民電郵查詢，稱香港正受到中央干預，希望登記做選民去改變現狀。佢話當時提供選民登記網址畀對方，而且覺得相關查詢好正路，認為係來自一般居民，但之後發現有多名區議員都收到類似電郵，先覺得有啲奇怪囉！

多名工聯會區議員都收到

佢又話喺各人嘅電郵中，查詢人嘅登記做選民原因都唔同，而且自稱住處亦根據該區議員而定。佢更話未知其他政黨嘅議員有冇收到，如果冇嘅話，就特別多謝對方抬舉工記，又借機會提醒，不論係惡作劇與否，只要登記一次做選民就夠喇！

據了解，工記嘅觀塘區區議員簡銘東、元朗區區議員姚國威、深水埗區區議員陳穎欣都收到同一署名嘅電郵，佢哋除咗以網址回覆，亦有人呼籲對方親臨辦事處尋求協助。