中環出更：翻孫九招舊帳 卿姐：曾蔭權害得我哋慘
前高官孫明揚（孫公）尋日接受立法會前議員劉慧卿（卿姐）訪問，卿姐提及早前同立法會議員葉劉淑儀碰面，對方就批評自「孫九招」推出停止售樓，搞到現時房屋供應短缺及樓價高企，孫明揚就為自己平反，明言「孫九招」推出時並冇講明必須保持不變，卿姐更批評時任特首曾蔭權「乜都唔做」、「害得我哋好慘囉！」
孫明揚解畫 話要靈活變通
孫公曾先後出任教育局局長、政制事務局局長、房屋及規劃地政局局長等，經驗相當豐富。但佢喺十幾年前為穩定樓價所推出嘅「孫九招」，近年就被指為房屋供應短缺及樓價高企的成因。佢除咗話「孫九招」推出時並冇講明必須保持不變外，仲以駕駛作比喻，指如果揸車期間遇上高山都唔採取應急措施，照撞上去嘅話，結果一定係「實撞死你喇」！佢更強調所有政策都需要靈活變通，重申當年有超過廿萬負資產，所以先推出有關措施。
劉慧卿更大嘆，時任特首曾蔭權「害得我哋好慘囉」，指出對方「乜都唔做」，因為當時停建居屋，而且好多嘢都唔做，所以接手嘅人面對前朝遺留嘅問題而變得「好慘囉」！
卓妮