政情：官非 破產懶理 張秀賢 姚松炎出戰補選
立法會四區補選喺明年三月舉行，泛民主派將就其中兩個區搞初選，仲喺尋日截止報名。因為參與佔領行動而惹上官非嘅前中大學生會會長張秀賢就一於少理，照去參與新界東初選，仲話唔擔心案件會影響佢參與補選。另一邊廂，被取消立法會議員資格（DQ）嘅姚松炎，縱使被立法會追數面臨破產危機，尋日亦報名參與九龍西選區補選嘅初選。
姚多次改口 終決定轉區
張秀賢尋日宣布參與初選，解釋話單官司喺出年一月會做審前覆核，加上仲有反新界東北發展案、衝擊政府總部東翼前地案等緊上訴，認為呢兩單案嘅判決或會影響自己單官司，所以估計都要搞一段長時間。另外，沙田區議員陳國強尋日聲稱參加初選，張秀賢就話過去有同對方溝通，指如果對方出選，會尊重佢意願，但自己就唔評論嘞！
喺九龍西方面，姚松炎早前話積極考慮喺番建築界補選中出戰，後來傳出佢會出戰九龍西選區時，有指佢稱若有「凌駕性需要」先會轉區，但最終都係決定轉區出戰。不過立法會行管會早排出信追薪，被DQ嘅姚松炎或會面臨破產危機。
負責協調初選嘅民主動力尋日公布，一共收到七個有效報名，喺九龍西選區有四個、新界東選區有三個。喺新界東選區，除咗張秀賢，仲有新民主同盟范國威同工黨郭永健。而九龍西就仲有民協馮檢基、公民黨前成員曾健超同民主黨袁海文。