政情：個底花晒 仲選人大 劉夢熊唔知醜
前全國政協委員劉夢熊較早前因妨礙司法公正罪成而被判囚十八個月，今年年頭先出獄嘅佢，尋日竟然如先前傳言所講，正式報名參選第十三屆港區全國人大選舉，而更令人驚訝嘅係佢透露自己攞咗三十一張提名票當中，包括戴罪之身嘅前特首曾蔭權爵士，唔知係咪因為佢哋都曾經坐過監嘅關係，所以互撐呢？之但係劉夢熊個底咁花，竟然仲咁唔知醜去選人大。
除咗劉夢熊坐過監之外，曾蔭權早前亦因公職人員行為失當罪成被判囚二十個月，已經坐咗兩個幾月監，目前保釋等候上訴，可謂係戴罪之身。而喺上月底召開人大選舉會議選出主席團，曾蔭權竟然現身，卻冇喺主席團名單上，成為唯一一位冇入選嘅前特首，已經瘀到爆，就連劉夢熊當日亦有到場攞人大選舉提名，兩人咁招搖現身，簡直係攞架嚟丟。事隔唔夠兩個禮拜，到咗尋日人大選舉截止報名，劉夢熊先攞住包括曾蔭權在內嘅三十一個提名去報名。
獲曾蔭權提名 否認同坐過監有關
點解攞到曾蔭權嘅提名，劉夢熊否認係同坐過監有關，仲話佢早喺十二年前，即二○○五年已獲曾蔭權委任為中央政策組顧問，其後亦都有唔少公職合作，甚至二○一○年嘅銅紫荊星章亦都係曾蔭權頒畀佢，所以佢認為係曾蔭權對佢有足夠嘅了解先決定提名支持佢，同坐監完全無關喎。係咪因為了解咁簡單呀？抑或佢哋都曾經坐過監，同樣個底花晒，係臭味相投呀？但最令人不解嘅，係劉夢熊之前犯嘅係刑事罪，監都坐完，點解佢嘅銅紫荊星章仲未搣柴呢？
劉夢熊尋日仲話要「是其是，非其非」，又話要守護一國兩制，未免有啲大言不慚，而只有三十一張提名票嘅佢想「低開高收」，似乎仲有一定難度，唔通佢以為坐過監就可以博到同情，令其他選委畀張票佢咩！
約六十人報名參選人大，當中亦有本土派同泛民嘅人士。繼早前七名傘後組織「鳩嗚團」成員報名參選後，尋日搭尾班車報名嘅仲有香港民主進步黨嘅楊繼昌，並提交十個來自民主300+嘅提名，同埋冇簽署擁護國家憲法確認書嘅公民黨立法會議員郭家麒。搞港獨嘅、搞不合作嘅，再加埋坐過監、個底花晒嘅劉夢熊，呢啲人搞到人大選舉烏煙瘴氣。