中環出更：逃出鬼門關 謝鴻興開心夾Band
昔日嘅廟街有平民夜總會之稱，當年歌女喺街邊賣唱同睇掌，依家都變成唔少人嘅集體回憶。早前卓妮喺廟街撞到醫學會前會長謝鴻興同班朋友喺街頭獻藝，佢喺舊年曾大病一場，仲話當人喺鬼門關度打個轉就會有所領悟，所以依家只會做啲自己開心又會令人開心嘅事，就好似夾Band咁，大家一齊玩真係Happy到震。
其實嗰晚係香港律師會前會長王桂壎（Huen）同謝鴻興以及一班律師醫生老友，齊齊拉大隊去廟街夾Band，為慈善出一分力。謝鴻興舊年因小腦中風，曾要開腦減壓治療，依家已經好番晒，當時佢形容呢場病可謂「執番條命」，唔單止令佢醒悟要放慢啲步伐，嗰晚佢仲呼籲大家要珍惜眼前人添！
王桂壎招募義工一齊玩
Huen話呢個活動已經連續搞咗三年o架喇，最大嘅目的就係幫區內一天主教會招募義工，同時又可以娛樂吓街坊，而且畀佢哋呢班Friend一齊玩吓。佢仲好感嘆咁話班老友都係專業人士嚟，個個都擔任緊唔同嘅公職，平時忙到不得了，叫佢哋抽個周日出嚟做義工真係好難得，希望今晚過後可以招到義工，明年都繼續同大家一齊玩。
唔止一班醫生同律師大展歌喉，就連曾經多次公開獻唱嘅新民黨立法會議員容海恩（Eunice），當日喺立法會做完嘢都趕過去撐場，Eunice又再大展歌喉唱經典歌，包括《千千闕歌》、《Pretty Woman》同《夜來香》等。Huen就大讚Eunice歌聲繞樑三日，又話所有聽過佢唱現場嘅人都知有幾正，真係唔明點解有人會話Eunice係鵝公喉喎。
卓妮