政情：稱「真心擁護憲法」 鳩嗚團7員選港區人大
第十三屆港區全國人大代表選舉尋日繼續接受提名，上午再有六名違法佔領行動後衍生嘅傘後組織「鳩嗚團」成員報名參選，連同之前已報名嘅一名成員，鳩嗚團今次共有七人參選。六名鳩嗚團成員尋日各持十多個民主派提名報名，報名期間亦冇展示任何標語或嗌口號，最後順利完成報名程序。
對於今屆選舉要求參選人簽署聲明，承諾擁護憲法和效忠中華人民共和國，鳩嗚團成員強調佢哋係真心擁護憲法，貢獻國家，只是認為當權者有問題，所以相信唔會被DQ（取消參選資格）。
科大副校長葉玉如都有報名
香港科技大學副校長葉玉如亦有報名，佢係首次參選，提交約一百七十多個提名，包括多名大學校長及高等教育界人士，明日（4日）會再補交更多提名。葉玉如話，希望透過參選人大，加強中港之間嘅科研合作及學術交流。