政情：楊華勇愛嘗新出差唔怕唔適應
一帶一路橫跨歐亞大陸，覆蓋範圍廣泛，為商界帶來唔少商機。不過，由於唔同地區嘅文化各有特色，同香港亦有差異，香港人要去當地做生意可能都需要適應。而中華總商會副會長楊華勇就冇有怕，仲話自己鍾意嘗試新事物，唔會出現適應問題喎。
因鍾意就算水土不服都值得
中總一連三日喺遮打花園舉行「一帶一路繽FUN遊」，為市民送上一帶一路地區嘅特產，活動喺今日就踏入最後一日。楊華勇話，佢早前首次到訪埃及，感覺耳目一新，當地嘅食物多數以豆為主，同香港有好大分別。同行人士幾日後就開始對當地食物食到厭，但佢就依然覺得唔錯，好有新鮮感。佢就話，自己鍾意接觸新事物，加上接受能力高，就算出現水土不服都覺得值得咁話。
活動籌委會副召集人陳光明就透露已經踏足過大部分一帶一路沿線國家，而佢近年就去多咗中東，同唔少香港人一樣都鍾意享受異國風情，希望可以過一啲有別香港嘅生活喎。