政情：張秀賢戰補選 割席港獨為洗底
立法會四個議席補選定於明年三月舉行，中大學生會前會長兼前學民思潮發言人張秀賢表明有意出戰新界東補選，亦願意參與稍後民主派的初選，佢一向親本土、自決派，但尋日出席由匯賢智庫舉辦、主題為港獨爭議嘅研討會時，就親口話「我唔係本土派」、「港獨唔係我主張」，同港獨及本土派徹底割席，務求洗底以利選戰。
以民主派自居
張秀賢與本土派和港獨割席早有先兆，佢今年六月成立新組織「立言香港」，已避用港獨和自決字眼，惟當時被問到是否支持本土派主張，佢僅稱「不會將自己識嘅武功話晒畀人知」，態度曖昧。隨着補選臨近，眼見港獨愈來愈冇市場，張秀賢尋日就索性同港獨及本土派徹底割席，又以民主派自居。
研討會由盛傳代表建制派出戰香港島補選嘅新民黨陳家珮擔任主持和總結。被問到安排是否為了增加陳家珮的曝光率，匯賢智庫兼新民黨主席葉劉淑儀就話，佢好着重培訓新人，又形容自己係「跑道」，至於係咪已確定陳會出選，佢就話要先拜訪友黨協調喎。