政情：張炳良無官一身輕 議員區會逐樣鬧

斥議員將問題放大批判

張炳良獲上屆政府邀請加入熱廚房，出任運房局局長，佢理應憑藉回歸前擔任過民主黨副主席及立法局議員嘅經驗，有望緩和緊張嘅行政、立法關係。不過，張炳良負責房屋及交通兩個燙手山芋，結果中間人做唔成，反而成為箭靶，喺立法會屢屢中箭，結果儲埋一肚氣，尋日終於爆喇！張炳良批評，近年部分議員當自己係「雞蛋」，將政府當作「高牆」，將所有問題無限放大去批判，將「責怪和羞辱」當作行政、立法之間嘅唯一模式。

寸爆立會「五十步笑百步」

張炳良舉例話，有時審計署報告列出嘅政府問題，唔少係署方幾年前搜集資料時嘅過時資料，但議員每次就手執報告盡情炮轟官員，官員只能夠無奈坐喺議事廳慢慢解釋。佢又寸爆立法會「五十步笑百步」，指議員經常話政府嘅架構「疊床架屋」，但輪到立法會不滿意政策時，咪又係設立唔同委員會去跟進。對於政府施政步伐慢嘅批評，佢又拉埋立法會落水，話即使簡單如交通違例定額罰款告票更改字眼，亦要立法會審批，唔慢先至出奇。

回顧五年局長任期，張炳良承認房屋政策理應可以做得更好，指增建公屋係社會共識，但係去到地區就充滿阻力，埋怨無一個區議會肯支持喎。不過，埋怨歸埋怨，但有啲問題就無得賴人，好似沙中線超支咁，今年初張炳良仲做緊局長時已經傳出超支消息，但佢一直拒絕證實，結果拖延到年尾，港鐵先話最快年底前交出超支估算。

張炳良就話，其實沙中線土瓜灣站發現文物，當時港鐵已經知會政府可能會超支四十億元，但最後個數係幾多，都要睇港鐵提交嘅文件。至於超支會唔會無上限，張炳良就話唔會嘅，因為現屆政府會把關喎。講得咁口響，咁佢做局長時又有冇把好關呢？