政情：郭永健求支持參選寄錯信畀袁彌明
做咗唔夠兩個禮拜工黨主席嘅郭永健，日前已宣布有意參加明年三月舉行嘅立法會新界東補選，更寫信畀各政黨尋求支持，但佢寫畀人民力量（人力）嘅信，竟然寫咗畀前主席袁彌明，真係甩晒轆。但我哋發現人力嘅網站顯示，主席仍然係袁彌明，所以又唔怪得晒郭永健喎，佢都可能係被誤導喎。
現任人力主席、立法會議員陳志全（慢必）尋日爆料，指收到郭永健寫畀人力尋求支持參選嘅信件，但信件嘅收款人竟然寫咗「人民力量主席袁彌明」。慢必就笑稱︰「我係咪要回信畀工黨主席胡穗珊（前工黨成員）？」事關袁彌明卸任主席已經好一段時間嘞！
被當係「笑話」
慢必展示郭永健嘅信件，一張紙寫到密密麻麻，睇嚟郭永健都相當有誠意，但竟然寫錯人名就真係百密一疏。慢必話就連工黨立法會議員張超雄睇過封信後都有啲愕然。不過慢必亦只係當一個「笑話」，睇嚟並唔太介意。
被問到係咪會支持郭永健參選，慢必就話人力暫時唔會支持任何人士參選，等民主派初選選出人選之後，先會考慮係咪支持。