政情：高佬賢牛一 議員祝連生貴子
立法會漁農界議員何俊賢（高佬賢）尋日生日，但因為立法會拉布，高佬賢連生日都要留喺立法會度過。一眾建制派議員就為高佬賢慶祝生日，有人祝高佬賢「快高長大」，亦有人祝佢連生貴子，議員梁美芬仲話要介紹中醫畀佢添！莫非高佬賢喺「連生貴子」方面有困難？佢即刻澄清，自己身體冇問題，但都可以調理一下。
生日願望想同家人食飯
高佬賢結婚三年，各位議員都趁佢生日祝佢連生貴子。不過，問到高佬賢自己有乜生日願望？佢就話其實好想同家人正常咁食餐飯。佢話早前佢返屋企食咗媽媽為佢預留嘅晚餐，媽媽後來打電話問佢係咪好食，令佢想起因立法會開會，已經好耐冇同家人食飯嘞！
咁經常返唔到屋企食飯，太太有冇埋怨佢？高佬賢就立即話太太冇埋怨，只係「好關心我啫！」