政情：反威權遊行炒冷飯 狂掠水（抓）安家費

社民連、香港眾志等多個組織尋日召開記者會，公布將喺周日再次搞「反威權」遊行嘅安排，今次名為「與抗爭者同行　抗擊威權政治」，遊行同樣由灣仔修頓球場出發，而終點係中環終審法院，抵達終點後仲會有集會。吳文遠話已就遊行申請咗不反對通知書。至於遊行人數方面，佢就話唔會預期，而喺申請通知書時就填咗約二千人。

佔旺案 黃之鋒料再被判囚

早前獲准保釋嘅黃之鋒喺記者會上話，早前兩次聲援在囚社運人士遊行中，自己身在監獄未能參與，而佔旺藐視法庭案將喺本月七日判刑，自己或會再次被判囚，因此喺再次入獄前出席呢次遊行。另外，羅冠聰、周永康、社民連副主席黃浩銘連同多名獲保釋等候上訴嘅社運人士都會參與今次嘅遊行，吳文遠仲開宗明義咁話呢次遊行將為「在囚抗爭者支援基金」、「守護公義基金」籌款，仲強調大會冇指定嘅籌款金額。

臨坐監去遊行 疑為賺訟費

早喺八月份、當黃之鋒等三人入獄後幾日，幾個組織就好快籌備咗名為「聲援政治犯」嘅遊行。喺當日民主派、本土派同學界都齊齊現身撐場，而大會亦都罕有地冇公布實際人數，只係由大會發言人、學聯前副秘書長岑敖暉聲稱參與人數係二○一四年佔領行動後最多人嘅一次，而所籌得嘅款項亦超過二百五十萬港元。喺唔夠兩個月後，同一班組織又趁住十月一日再搞遊行，名為「反威權大遊行」，要求律政司司長袁國強下台，而主辦單位聲稱有四萬人參與，同時籌得逾一百一十萬港元。

「守護公義基金」之前曾騎劫遊行，先係話幫取消立法會議員資格嘅人畀訟費，之後又話轉嚟資助佔領行動嘅人士，被鬧爆搵市民找數，而「在囚抗爭者支援基金」就係要市民幫埋反東北被判監嘅人畀「安家費」。嚟緊嘅遊行又炒冷飯，又係為呢兩個基金籌款，除咗黃之鋒要面對稍後佔旺藐視法庭案外，雙學三子衝擊政府總部嘅終審上訴喺明年一月開審，佢哋隨時可能會再次入獄，唔知係咪因為咁，所以佢哋出晒嚟參加呢次遊行，想為日後嘅訟費同「安家費」掠多啲水？