中環出更：航拍無王管 田二少驚「春光乍洩」
近年航拍機盛行，明媚嘅海岸更成為航拍熱點。但有深井及青龍頭沿岸嘅住戶話窗外經常有航拍機飛過，擔心被偷拍屋內私隱，立法會議員田北辰（田二少）批評現行法例下，只要航拍機唔儲存拍到嘅影片，私隱專員公署同警方都「無符」，批評航拍機「無王管」。
田二少話最近收到深井同青龍頭一帶嘅居民投訴，指屋企對出海面經常有航拍機飛來飛去，擔心私隱外洩。佢話唔少海景戶嘅大廳同浴室都係向海嘅，容易被有心人利用航拍機偷拍，「沖緊涼咪被人影到晒，唔通落簾呀？咁買個海景嚟做咩？」
要求民航處私隱署檢討
其實佢曾經喺荃灣區議會提出要規管航拍機，但私隱專員公署則指只要唔儲存影片相片同向外發布就唔算違法；又話假如只拍攝到身體部位，唔會令人認出被拍者，即使儲存同發布亦唔違例。佢又引述警方話只要唔喺人多嘅地方飛行同埋機身體積唔大過規定就不屬違法。
講到咁，田二少當然唔收貨，佢批評香港欠缺法例監管航拍機，要求民航處同私隱專員公署檢討。
卓妮