中環出更：鄧宣宏雁：做生意要重團隊精神

香港女童軍早前舉行周年晚宴，唔少政商界名人出席，女童軍嘅核心骨幹好似香港總監李周美枝同副會長邱吳惠平當然喺度坐鎮，而鄧太嘅丈夫鄧鉅明更以實際行動支持太太，成場傍實太太添！

鄧太話專門畀女孩子參與嘅制服團體唔多，而女童軍就可以培訓佢哋自律，所以女童軍非常值得支持。而佢更話經營生意都需要有同制服團體相似嘅訓練，好似訓練員工領導能力、鼓勵下屬技巧等。雖然佢強調對員工嘅訓練係唔會停，但就話員工好投入同享受，而早前更舉辦員工旅行一齊去玩輕鬆吓。

剛出任名譽副會長嘅蔡加敏就帶同一對仔女到場，佢話仔女都有參加女童軍轄下嘅「快樂小蜜蜂」計劃，希望佢哋可以學習到書本以外嘅知識。其中最難忘係帶佢哋去農田種米，體驗種植農作物嘅困難，亦學習唔好浪費食物嘅道理，大女一聽到就大呼好好玩，似乎非常回味。

陳國基（右）直言非常着重步操環節，圖左為李周美枝。

蔡加敏（中）鼓勵仔女參加制服團體，冀多學習課本外嘅知識。

陳國基話步操助訓練紀律

紀律部隊出身嘅特首辦主任陳國基亦有到場，佢話學習步操能夠訓練紀律，所以佢都好支持參加制服團體。不過，屋企得佢有紀律部隊背景，而囡囡細細時都無玩過制服團體喎。佢解釋，囡囡以往學業忙碌，所以放手由佢選擇活動。睇嚟佢唔係怪獸家長嘞！

卓妮