政情：李偲嫣再婚 老公係港專「鋮浚哥」
正義聯盟主席李偲嫣有第二春，擬定明年五月結婚！本報記者尋日喺入境事務處婚姻登記查冊，發現一張新娘為李偲嫣及新郎為謝鋮浚嘅擬結婚通知書，致電李偲嫣求證，佢開心承認已同現職香港專業進修學校國際教育部副總監謝鋮浚訂婚，計劃喺明年五月結婚，又形容「佢（謝鋮浚）係上天畀我最好的禮物，係我背後的力量，係真愛」。
年齡被「報大數」 細對方一年
根據嗰份擬結婚通知書嘅資料顯示，李偲嫣同謝鋮浚都係再婚，李偲嫣嘅出生年份較謝鋮浚早三年，即年齡較謝鋮浚大三歲。但據知，事實上李偲嫣較對方細一年，因佢當年在港出世時，其母為佢領取新生嬰兒許可證後曾出境到澳門，之後再回港為佢補領香港出世紙，令佢嘅年齡被「報大數」。
身兼香港家長聯會會長嘅李偲嫣憶述，喺一五年十一月經朋友介紹認識未婚夫謝鋮浚，首次見面時雙方係討論教育議題，其後成為好朋友，跟住開始拍拖。佢透露男友最近向佢求婚，而求婚過程相當浪漫，「當時喺天星碼頭後面嘅停車場，佢面對住維港，拎住紮花同戒指，跪下向我求婚，我真係覺得好驚喜、好感動。我應承咗嫁畀佢」。
佢話現時未婚夫為方便照顧患病嘅父母，故搬回葵涌一屋邨單位與父母同住，佢哋計劃婚後亦搬到上址附近居住，方便繼續照顧。另外，佢尋日黃昏時分亦喺Facebook上載一張戴上訂婚鑽戒、十指緊扣嘅照片「放閃」，又話感謝大家嘅祝福。