政情：打針防流感 張華峰：劑量同身形有關？
冬季流感高峰期即將來臨，食物及衞生局局長陳肇始尋日率領一班護士到立法會，為超過二十名議員接種流感疫苗，借活動鼓勵市民打針以預防流感。其中，重量級議員張華峰（肥老闆）就非常關心打針一事，趁接種疫苗時專程向協助打針嘅醫學界議員陳沛然發問，仲問到市民接種疫苗嘅劑量會唔會同身形有關添。而佢打完針就形容好似畀蚊咬咁，照咁睇嚟，打針所帶來嘅痛楚先係同身形有關喎。
另一議員張宇人就大讚打針嘅護士手勢好，打完都唔覺痛，反指醫生打先痛。咁點解唔叫護士出身嘅陳肇始幫忙呀？佢就話唔知陳肇始幾耐無打過針，難怪全程都唔見陳肇始出手為議員打針喇！
容海恩擺晒甫士
尋日就只有議員容海恩一名女將打針，但佢就非常淡定，打針期間仲識得擺好甫士，並冇重演出現上年有女議員嗌痛嘅情況。另外，泛民主派亦只得陳志全一人打針，佢講笑咁話現時正值打仗時期，所以其他泛民擔心打針後會有反應喎！而佢打針時亦獲「重點招呼」，佢解釋係恤衫太緊，引嚟其他議員慫恿「打Pat Pat」喇！