政情：房協大堆重任要(目及)實 狂擸前高官幫手

凌嘉勤喺舊年底退休，相隔一年，上星期加入成為房協委員之一，粗略數番原來房協嘅全體委員中，最少有六、七名前高官，包括教育局前局長吳克儉、屋宇署前署長區載佳、規劃署前署長凌嘉勤、地政總署前署長劉勵超等，前房屋及規劃地政局常任秘書長梁展文、前政府經濟顧問郭國全，唔少以往都係負責規劃房屋嘅政策。

研究郊野公園邊陲建屋等

其實，房協嚟緊有多項重要嘅房屋任務，包括研究郊野公園邊陲建屋，又要搞容許轄下未補地價嘅資助出售房屋業主，以低於市價分租單位畀有需要家庭居住，甚至可能連「港人首置上車盤」都要幫幫手，呢堆新計劃都唔係以往框框以內需要處理嘅事情，唔知係唔係因此要狂擸呢班前高官去幫手構思吓、監察吓，以免出事呢？

鄔滿海：委任已作多方面考慮

房協主席鄔滿海就話委任邊位做委員係房協嘅整體決定，同嗰個人係咪前高官冇直接關係，反而係就各領域嘅認識、專業同經驗等作多方面考慮，例如需要有投行人才睇住啲投資，委任外界業內人士時，亦要小心避免造成利益衝突嘅觀感，但係如果全部係退休人士亦唔太理想，而全部委員都不受薪嘅，只有執行委員會因為每個月都開會，就有少少車馬費。房協其後補充，全體委員有過百人，並非全部都參與業務討論，其中只有約三十人係監事會及執委會，前高官只有數個。

講真嗰句，房協搞咁多新計劃，想搵多啲專業人士幫吓眼，亦相當正常，但可能都要考慮吓，咁多前高官會唔會影響觀感呀？