貧窮人口突破一百三十五萬人，即每五名港人就有一人貧窮，創○九年以來新高。勞工及福利局局長羅致光早前提及冇可能完全滅貧，尋日又喺網誌以滅蚊為例，即使唔能夠完全滅蚊，但仍會採取滅蚊行動，故即使唔能夠完全滅貧，仍須繼續扶貧同防貧。好明顯，羅致光係想為政府扶貧不力護航，正所謂數據就係證據，事實係政府愈扶愈貧，佢與其去搵藉口，倒不如諗吓對策更實際喇！
