政情：今日你上鏡：行山被捕獲黃錦星即場接投訴

天氣好最好梗係去行山喇，有益身心，甚至可能會撞到熟人添！話說沙田區區議員曾素麗日前同班街坊一齊去行山，喺途中竟然野生捕獲環境局局長黃錦星。曾素麗喺Facebook上載咗張合照，咪以為Say hi and bye，打過招呼就算，曾素麗即時衝埋去同黃錦星反映區內嘅噪音問題，仲話公餘時間局長都照接投訴喎，黃錦星都不忘提醒大家行山記得自備水樽添！有網友就留言大讚黃錦星夠貼地，但亦有網民質疑：「黃錦星叫貼地，呢句真係嘆為觀止」。