民主派早前聲稱無意派人參選下月十九日舉行嘅新一屆港區全國人大代表選舉，包括公民黨立法會議員郭家麒曾向傳媒稱，如要簽署聲明擁護國家憲法嘅聲明，就唔會參選，但佢正式「反口」向傳媒發出採訪通知宣布參選港區人大，並喺今日下晝舉行記者會交代。
雖然距離投票日仍有一段時間，郭家麒嘅選舉結果早已寫在牆上，因為港區人大選舉係「全票制」，約二千名選民一人需投三十六票，據報民主派今次有約二百多票，就算全數支持民主派參選人，都不足以勝出今次選舉。
資料顯示，民主派參選港區人大嘅往績都係慘敗收場，五年前南區區議員司馬文同教協理事方景樂，分別只取得二百二十六票同一百七十二票，同上屆以第三十六名當選者、自由黨榮譽主席劉健儀得到一千零四十二票，相距甚遠。
另外，三年前因違法佔領行動催生嘅旺角鳩嗚團，其發言人錢寶芬話不滿疑有外國籍人士參選港區人大，佢話鳩嗚團將會組織三十人參選隊伍，期望得到民主300+支持，給予各人十張提名票以角逐人大議席。