政情：韋志成：市建局買起800幢舊樓邊個信？

市建局自一三至一四年度錄得二十三億元赤字後，翌年突然錄得十一億元盈餘，之後庫房持續「水浸」。其實韋志成喺早前發表嘅網誌已解畫，話唔好見市建局有盈餘就話係「賺到盡」，又話預計未來數年將有三百多億元現金支出，會用喺需求主導計劃、樓換樓安排、樓宇復修計劃等措施，條數啱啱好冚番晒資產淨值嗰三百幾億元，擺明係想話冇水浸呢回事喇。

稱處理油旺區後或蝕逾千億

唔知係咪見仲未說服到市民，韋志成尋日又喺網誌話市建局喺今年五月展開咗一項為期兩年嘅油旺地區研究，初步資料顯示，區內嘅樓宇中約有八百三十七幢已用盡其地積比率，甚至達「負數」，超出現行城市規劃同法例框架所准許嘅發展密度限制，並揚言單單處理呢八百多幢舊樓，喺扣除收益後將可能面對接近一千三百八十億元財務虧損。佢又話油旺區嘅研究涉及三千三百五十幢樓宇，強調如果唔拆卸重建，改為幫呢啲樓宇進行復修，估計需要投放每平方呎約一千至二千元，係現時一般公共地方復修每平方呎金額嘅十倍或以上。

靠嚇博洗底 「賺到盡」有前科

佢又強調自佢上任以來，絲毫冇感到市建局以「賺到盡」作為制訂同執行政策嘅考量點，相反正因為唔係以「賺到盡」出發，喺過去多個月，管理團隊先至會推動多個唔同嘅大型研究。

係咪「賺到盡」唔係靠把口講嘅，睇番市建局過往將舊樓拆卸重建後，被外界批評係賣天價樓，更加被質疑市建局嘅方針趨向「向錢走」，如果唔係有前科，市民又點會覺得市建局係賺到盡吖！

再講，韋志成依家講到市建局未來唔單止可能蝕千幾億元，仲預告呢啲舊樓復修後價錢必定貴添！咁究竟市建局係咪真係會買晒呢八百多幢舊樓先？否則講到咁大，無非都係想為「賺到盡」洗底，想洗底都唔使靠嚇o架！