中環出更：張宇人撐修例非「自閹」轟泛民倒錢落坑渠

民主派同建制派正就修改立法會《議事規則》問題開戰，身兼行政會議成員嘅建制派議員張宇人（Tommy）尋日喺電台表示，民主派指控建制派嘅修例建議，會削弱佢哋嘅言論自由同監察政府嘅權力，甚至形容建制派係「自閹」。佢當然唔認同有關講法，反轟民主派拉布係「倒錢落坑渠」。

Tommy話拉布行動根本無助加強監察政府，亦無法阻止政府議案通過，只能拖延通過嘅時間，令政府同立法會花費更多人力及公帑，好多有利經濟民生嘅法案、撥款同工程延遲落實。單計佢擔任財委會主席嘅二○一四至一五年度，拉布行動就導致多個項目因通脹而多花咗廿八億元，呢啲都係市民嘅錢，唔應該被倒落坑渠。

佢又話香港立法會嘅《議事規則》源自英國國會，對方嘅議事程序喺多年來已經過多次修改，部分修訂正係為咗打擊拉布，香港嘅部分規則明顯已過時。佢呼籲公眾支持修例工作，令立法會運作重回正軌。

卓妮